本周四晚（4 月 11 日）播出的一集《Mayanne 小喇叭》，主題是「娛樂圈中真‧友‧情」，邀來林峯及吳卓羲（Ron）兩位好兄弟擔任嘉賓，是次更是二人相隔多年後，再在無綫節目中同框。
林峯主動約食飯
相識長達 25 載的「Ron 峯」在節目中大談相識經過、日常相處，兼互爆對方秘密。感情要好的二人除了每日都必定會聯絡對方，更經常互到對方家中過夜，感情猶如親人。
原來當年是林峯主動聯絡 Ron 約食飯，Ron 坦言嚇了一跳。「佢打畀我嗰陣時，我都打咗個凸，嗰時佢已經拍《尋秦記》，佢話約我食飯，我就覺得咁奇怪嘅？然後就一步步建立關係。」林峯亦大方向 Ron 發表愛的宣言：「鍾意你吖嘛！」林峯透露當年冒昧採取主動，全因看到 Ron 落下男兒淚的感人一幕，Ron 聞言即指自己也是因為錄影這個節目，才知道林峯當年「睇中」自己真相。
阿峯當年因為一個原因，主動聯絡 Ron 約食飯。
大爆打底搞笑事
阿峯與 Ron 又應製作組要求，翻看當年拍攝《大唐雙龍傳》時露股一幕。面對這幕被傳頌多年的經典場口，Ron 爆料指是臨場應導演要求進行拍攝。「初初劇本冇，佢哋話不如整場令伍姑娘尷尬少少（嘅戲），咁佢有咩會尷尬呢？導演就提議除晒，我就問：『出唔出得街呀？除冇問題吖！我哋咁嘅資質，但點樣遮住前面先？」林峯笑笑口說：「現場有啲大垃圾膠袋，我哋就剪咗個角落頭落嚟。」Ron 搞笑接著說：「我望住佢剪幾大，我咪再剪大啲，鬥大咯！重點係我哋用牛皮膠紙黐。」林峯即大表認同：「黐嗰陣冇問題，搣嗰時大鑊。」說得興起，Ron 還大爆搣膠紙時苦況。「要搵𠝹刀𠝹！𠝹咩？毛咯！我哋互幫大家，現場冇人夠膽幫我哋𠝹！」除了經典場口，二人還會分享當年在超過五十度高溫下拍攝苦況，林峯一度問監製：「我哋會唔會死」，以及演員及幕後如何在時間緊逼的情況下，靠勁高默契極速在十分鐘內，完成一頁半紙劇本拍攝。
重溫當年二人合作的經典場口，笑到合不攏嘴。
藝訓班青澀樣曝光
向來花生多多的《小喇叭》是集還會曝光「Ron 峯」昔日於藝訓班及 Dancer 訓練班的青澀樣。 Ron 大嘆當年髮型不堪回首，「呢張相唔該（airtime）出短少少。」
製作組又找來二人當年為《全城火熱穿梭奧運夜》跳唱的片段，片段除了有阿峯與 Ron，還有黃宗澤、馬國明、黎諾懿及陳鍵鋒。主持麥美恩（Mayanne）笑指眾人當年舞步不多夾，Ron 解釋謂：「我哋當時全部都好忙，我哋排舞好難夾得齊人。我哋嗰時每一個包辦一間廠，每次走出廠喪屍咁。呢個最夾架喇，再拍一條冇可能架喇。」
這張圖有不少熟悉的面孔，包括林峯（上排左二）、楊明 (上排左三) 及楊茜堯（二排右一）。