《愛‧回家之開心速遞》今（6 月 1 日）明兩晚劇情十分精彩，主角將是觀眾極為喜愛的龔水 CP—龔燁（張景淳飾）及熊若水（呂慧儀飾）。
龔燁離開接龍展開第二人生
事緣 Madam Ceci（林漪娸飾）因肖像畫作被毁淪為笑柄，誓要大小姐（林淑敏飾）找出真兇！大小姐幾經衡量，決定犧牲龔燁，即時開除！Ceci 為了報仇龔燁，更使橫手令龔水無家可歸……
龔燁被炒後甚為清閒苦悶，無意間遇到一名龍鬚糖伯伯，遭對方的專注及專業啟發決心展開第二人生「活化」這個傳統美食，並在根叔（劉丹飾）教導下學整龍鬚糖……
今、明兩集最大亮點，是「龔水 CP」將上演甜過龍鬚糖的「世紀龍鬚糖之吻」，保證浪漫兼愛意滿瀉，萬勿錯過！明晚（2 日）一集，為了配合劇情，張景淳很多場口都是親身上陣真‧拉龍鬚糖。對此，張景淳接受官方訪問時，坦言劇組有安排專業師傅在旁邊拍邊教，並笑言「整唔難」，但要「好食就好難」，張景淳說：「每拉一嚿麥芽糖磚，先整得幾粒，所以龍鬚糖真係功夫嘢食，每粒都好珍貴。」
展開網路互動徵收民意
另外，今日熊家成員劉丹、呂慧儀（阿蟹）、滕麗名（阿滕）、周嘉洛、單立文及張景淳於電視城拍攝《愛‧回家》時，接受了東張西望及無綫娛樂新聞台採訪，首度披露即將迎來大結局的《愛‧回家》， 將於稍後推出多項網上活動與眾同樂，包括徵收網民及粉絲對於未來劇情走向的意見，以及將推出《愛‧回家》鐵粉 Q&A 問答比賽；觀眾及網民只需由 6 月 5 日開始，緊貼 TVB 官方社交網，及黐實《愛‧回家》，便會找到留言機會及參加問答遊戲互動 QR Code 。
對於編審劇組計劃推出官方版《愛‧回家》Q & A，一眾演員直指期待及想參與，金城安及張景淳更被睇死將會是最低分兩位玩家，阿滕更踢爆張景淳冇記性，「佢洗底比較洗得快啲。」阿蟹還開玩笑謂：「可以做問吓金城安到底錫過幾多個人。」
滕麗名招虐待大小姐大法
眾人受訪期間還大爆自己角色未來劇情重點走向，當中除了被炒龔燁何去何從外，還有安 Bon（周嘉洛+林凱恩）CP 及「雙大 CP（大小姐林淑敏+大家姐滕麗名）」走向，阿滕更順勢公開招募虐待大小姐大法。「其實我覺得呢，因為佢哋現實中對自己老細唔可以噉樣做，所以就寄情喺我哋嘅劇情入面，有個咁嘅正義之士出嚟、等佢哋對老細盡情報復。所以如果你哋想喺嚟緊劇情裏面睇我點樣虐待大小姐哩，絕對可以將啲意見寫落去（TVB 官方社交網）留言區度，我會盡情幫你哋發洩！」、「依個我相信都係啲觀眾最鍾意睇嘅，我哋兩個鬥嚟鬥去、互相廝殺咁」、「邊個會贏，就睇你哋（觀眾）喇。」
周嘉洛邀觀眾影響安仔感情去向
至於金城安除了被眾演員追問與 Bonnie 後續發展，更被認定與朱凌凌及李莫愁均相當「曖昧」， 十分搞笑。對於安仔最終情歸何處，周嘉洛與「媽咪」一樣公開呼籲網民嚟緊踴躍畀意見，影響編劇最後決定。「其實我都知網民有好多都好鍾意安 Bon 呢個組合，我覺得大家可以反映吓，睇下大家個力去到邊度，呢啲嘢（人物關係發展）真係好難講架嘛…」、「你哋大量畀壓力我哋嘅編劇」。最後，嘉洛更貫徹其搞笑油膩 Tone，並說：「我諗咩唔重要嘅，我係為大家而生架！」阿蟹則順勢感激《愛‧回家》編劇團隊一直的努力，「我真係覺得我哋啲編劇編審好犀利，諗 2000 幾集出嚟喎，真係唔係咁簡單嘅。所以去到結局篇，我覺得可以畀觀眾參與多少少，一齊 brainstorm 吓。」