【綜藝資訊】《女神配對計劃 2》吳旭東霸總式飛撲搶櫈阮嘉敏直認 Man 爆心動

本周日（10 月 4 日）播出的第五集《女神配對計劃 2》，五位女神何沛珈（Roxanne）、阮嘉敏（Mandy）、陳若思（Amber）、俞可程（Kanis）及郭珮文（Juliana）與 16 位求愛勇者繼續進行五角枱淘汰環節！

今集除了有 Juliana 及 Kanis 的「主菜飯腳」通關考驗，還有「甜品飯腳」爭奪戰。值得留意的是，今季除由三角枱升級五角枱，這張五角枱更可一分為五，各自獨立成為一張三角枱，換言之成功爭取「甜品飯腳」的求愛勇者，將可與心儀女神撐枱腳歎甜品，期待值爆燈！

「甜品飯腳」如此吸引，16 位「求愛勇者」自然出盡九牛二虎之力爭崩頭！製作組率先公布了 Mandy「甜品飯腳」爭奪現場，當 Mandy 的關鍵詞「暖」一出，與 Mandy 心意相通的吳旭東（東東）及譚梓樂（Hepta）即一支箭標向前爭櫈坐，二人更咁啱睇中同一張櫈兼飛撲喪爭，場面極度混亂。原本被壓在最低的東東，不知那來的神力，用力彈起身，更索性成張櫈擸走兼直接放在 Mandy 面前坐下，更伸出拳頭示意 Mandy 來個「fist bump」，行徑極度浪漫有型兼霸道！

東東的霸總式示愛，令現場所有女神及花生團全線陷入了瘋狂叫囂狀態，阿 Ju 直頭講出口話「Respect」。被東東搞到像是韓劇女主角的 Mandy，全程笑到個嘴真係未合埋過，事後 Mandy 坦言覺得東東好 Man 。「其實都幾有型嘅嗰吓，好 Man 咯。」就連出名要求高的阿 Bob 亦對東東表示欽佩，當宣布東東有資格成為 Mandy「甜品飯腳」的候選人之一時，除了現場所有人「畀啲掌聲」，更忍不住讚嘆東東：「真係有型到哩！」而東東亦搞笑又謙厚地向全場鞠躬致謝，場面十分熱鬧。

雖然今季《女神》講明「心意相通」對象隨時洗牌，但東東明顯全心全意衝著 Mandy 而來，而且爭奪女神芳心絕不手軟，癡情程度令其成為花生團團寵。事緣為了與 Mandy 同枱，東東出盡全力衝鋒爭取 Kanis「主菜飯腳」名額、更一度因用力過猛，變滾地葫蘆兼電話都飛埋出嚟，獲花生團大大力欣賞。鄧凱文表示：「你完全知佢 aim for what，完全係 Mandy」Mandy 閨密鄧依婷更一再為東東打氣！

更浪漫的是，Mandy 與東東一樣長情。她在玩遊戲期間，透露曾「鍾意咗一個人九年，但我哋冇一齊過」，引發全場震驚，花生團 Sam：「Mandy 好專一喎，真係。」Mandy：「因為我小學三年級喜歡佢，升中學時再跟他同一個學校，佢不停同好多女仔一齊，但等極都係未到我，我就覺得失望夠」、「望住佢就有一種青春嘅感覺。」又大方得體、又如此長情，難怪有網民熱捧 Mandy 為「女神天花板」。