（2024 年 3 月 14 日）由林肯監製、黃秉怡編審的《G-NiiB 微生態配方特約：婚後事》（《Happy Ever After？》），逢周一至五晚九點半翡翠台播映，主要演員包括羅子溢、陳自瑤、黎諾懿、賴慰玲、羅天宇及王敏奕等。
想善仁過得開心嘅 Mira，成日帶善仁散心，但善仁好多時都唔多領情咁，因為善仁本身太多嘢煩
昨晚（13 日）播出的第 13 集主角敘述視點是靜海 Mira（王敏奕飾），標題是「一時一刻的真愛，到底只是一場誤認」。 Mira 自與善仁（羅子溢飾）開始後，一直致力成為「完美女友」，除了對善仁關懷備至、幫善仁分擔照顧女兒悅悅（鄭淽月飾）及爸爸潘良（煒烈飾）的工作、帶壓力爆煲的善仁到處散心，又積極接洽《婚後事》網劇編劇工作希望在經濟上支持善仁。雖然 Mira 每件事都向著善仁，可惜善仁不但不領情、還多番避開 Mira，甚至覺得 Mira 泛濫的愛令其更大壓力。最終在潘良企圖自殺及悅悅帶酒辦返學校等事件爆發後，善仁與 Mira 的愛情終步向滅亡。深信善仁是因為放不下前妻 Emma（陳自瑤飾）才嫌棄自己的 Mira，當聽到善仁想結束同居關係後情緒終極崩潰，大哭大吵大鬧一輪後，Mira 雖回復卑微乞求善仁留下，可惜最終善仁還是玩失蹤，令愛得不能自拔的 Mira 跌進萬劫不復的痛愛輪迴…
其實 Mira 呢啲質問，都顯示其實佢睇得好通透，只係佢唔想亦唔願意接受事實
相關場口內容是，當善仁表示要搬走後，原本已受盡委屈的 Mira，先是質問善仁，再一字一淚爆出委屈：「你叫我消失就消失，我幾時冇配合過你哋呀？」當善仁為衝動同居致歉並自責自私時，Mira 即滿眼悲忿淚水激動謂：「自私得過 Emma？」當善仁喝出一句：「你同我都冇資格再講以前！」Mira 的淚水即左右接連落下；對 Mira 不無心疼的善仁只能一再說 sorry，反而刺激 Mira 暴怒謂：「我唔係要你講 sorry 呀！」再以可憐的聲音續說：「我淨係想要一次，你講完 sorry 之後唔會再咁樣對我。我淨係想你愛我，答我吖，你愛唔愛我？」善仁聽畢甩開 Mira 的手並忍不住落淚謂：「你要嘅愛，我冇能力畀到你。」之後 Mira 再度暴走，直斥善仁所有事都是為了 Emma，並直搗善仁房間拿出收於暗處的結婚戒指怒掟善仁，兼逐漸進入歇斯底里的狀態：「你以為我唔知你收埋啲咩？你唔好話當佢哋屋企人，屋企人會攞戒指嚟憑弔？我做咩都係錯！」更瘋狂掃跌房中物品並失卻靈魂般跌坐地上嚎哭，再淚眼望向善仁：「因為你仲好愛佢，所以你唔想我咁愛你。」
呢場攤牌戲雖然唔係 Take 敏奕大頭，但離咁遠都感受到佢有幾咁傷心同激動
該場 Ending，是喊至「清湯掛面」的 Mira 回復冷靜後，由「暴走 Mode」轉回「卑微」Mode 向善仁道歉，並楚楚可憐表示只是想與善仁在一起；可惜善仁最終仍是堅持分開，Mira 只能卑微又傷痛地希望以情慾挽回善仁，但依然不得要領，痛得失卻理智的 Mira 躺在床上淒酸的說出一個明知不合理的方法：「你唔鍾意我嘅話，你可以打我架」，再以極可憐的聲線接著說：「但可唔可以唔好唔要我呀。」短短一個場口，敏奕極速遊走憤怒與悲愴之餘，就連把聲都有戲，而且整個發癲過程不趕客之餘，亦惹人憐愛，絕對是晒功架之作；而為了增加真實及憔悴感，敏奕該幕除了素顏上陣，更因長時間為場口喊足一整天喊至雙眼紅腫。
呢幕王敏奕選擇素顏上陣絕對正確，呢幕佢可憐又清秀到恍如小女孩，令人更加憐惜
而另一幕長約 1.5 分鐘瘋狂致電善仁的場口，敏奕則需梅花間竹極速游走空洞、暴怒、哀求及失控慘笑四個情緒，Mira 先是怒吼：「你講過唔會咁對我，點解你最後都要咁樣對我」、再卑微地哀求兼扮冇事：「對唔住呀，我冇事架喇，你打番畀我吖」、「有咩唔鍾意我，你講吖，我可以改呀」；恍如無止境停留在等候善仁空間的 Mira，更因太痛苦進入又喊又笑狀態，由於敏奕極入戲恍如與 Mira 合二為一，令不少網民喊濕紙巾之餘，更封敏奕為本集 MVP：「上次《新聞女王》已經做得好出，今次再一次特破，視后的路不遠。」
呢幕無論角色情緒、燈光、氛圍或是對白都極速跳 Tone，令人更代入 Mira 痛至完全混亂的心理狀態