【娛樂熱話】《女神配對計劃 2》Preston 貼心禮物冧郭珮文 Ice 坦承陷重大危機

本周日（10 月 25 日）播出的第八集《女神配對計劃 2》，繼續是「心跳電話亭」，12 位求愛勇者將爭奪與何沛珈（Roxanne）、陳若思（Amber）、郭珮文（Juliana）、梁超怡（Chiuyi）及陳星妤（Yvette）在電話亭中的 15 分鐘單對單相處時間，挑戰「心跳」主題考驗之餘，亦爭取機會傾吓偈增進了解。

Ice 送「過去現在將來」花束
今日官方緊接公布的，是 Juliana 及 Amber 的「心跳電話亭」。正如 Juliana 所料，想與她進行「心跳」考驗的，是其前度俞鋆瑞（Ice）及伍頌曦（Preston）！為了爭奪阿 Ju 芳心，二人不約而同準備了不少於一份禮物，令 Ju 受寵若驚。「見到佢哋都好有心帶咗禮物畀我，我都非常之苦惱，我覺得佢哋兩個都非常之好，都想多啲接觸吓。」Ice 為阿 Ju 準備的是三束分別代表過去、現在和將來的花束，宣傳照所見，過去和將來的花束相對大束，似乎寓意有阿 Ju 陪伴的過去，以及憧憬能有阿 Ju 繼續陪伴的將來會一樣精彩，相當感人兼有心思。不過阿 Ju 雖然口讚「好有意思」，但全程表情卻「一言難盡」，十分爆笑。

Preston 貼心送 4 貓鏡面手機殼
Preston 知道拍攝時阿 Ju 生日將至的他，送上了寫有 Juju 的「公仔盲盒」及印有阿 Ju 四隻貓的鏡面電話殼。選擇鏡面的原因，除了讓阿 Ju 可隨時隨地補妝、及減輕緊張感之餘，亦寓意阿 Ju 每次望著電話殼，都感覺與貓咪們在一起，極度有心！難怪阿 Ju 連環發出驚嘆 wow 聲：「好有心喎！」花生團羅毓儀及葉蒨文都感動不已。事後阿 Ju 亦坦言 Preston 的禮物很驚喜，「冇諗過佢咁了解我，送嘅所有禮物我都非常之鍾意。」由於阿 Ju 真係表現得太開心，令 Ice 自覺再度陷入極大危機。「我一看到這個禮物，就覺得 Ju 一定很喜歡，我有點擔心 Ju 可能不選我。」

吳兆麟奪陳若思心跳電話亭權利
Amber 的「心跳電話亭」則有求愛勇者吳兆麟（Alan）、林子朗及吳俊峰（Mark）列陣，不過主要戰火集中在 Alan 及阿朗兩大勁敵之間。為了討好感覺「小妹妹」的 Amber，Alan 全程化身「小學雞」，除了啄住阿朗捉字蝨，又上演瘋狂呷醋戲碼兼無厘頭「震波」，但亦因如此，反而成功令 Amber「冇咁緊張」，整體氣氛甜蜜又搞笑，值得期待。
在女神撳燈環節憑「真誠溫柔」Tone 贏得女神 Amber 及網民歡心的 Alan，這次轉玩「搞 Gag」路線一樣得。首先，Alan 在拉票時揚言為 Amber 親手做了小禮物，可惜兩次都唔記得帶，相當「另類」！之後，當 Alan 成功獲得入電話亭權利後，閒聊期間發現 Amber 竟與阿朗一起坐車出發前往拍攝場地時，大叫「咁 Close」之餘，還輕聲地追加了一句：「有啲呷醋喎」結果遭花生團梁敏巧 Maggie 吐槽直指太油膩，相當爆笑。