《中年好聲音 4》第二集《中年好聲音 4 決戰美加澳》將於本周日晚 8 點翡翠台播映。本季除了車婉婉，還加入了鄭衍峰做主持。《中 4》共設香港、大灣區、新馬、美加澳及 TVB 藝人五大賽區，評審為肥媽、周國豐、張佳添、海兒及谷婭溦（溦溦）。繼第一集後，第二集將再誕生多 3 名 5 燈選手，當中率先公布其中一名 5 燈選手，他是現年 35 歲、來自加拿大的現職髮型師鄭家聲（Nelson）。
海兒大讚聲線 sexy
Nelson 以極度有感情的歌聲，唱出莫文蔚名曲 〈他不愛我〉，除了一開聲已令溦溦及肥媽驚艷，更獲得在第 4 季中明顯手緊不少的張佳添的高度評價：「我成日講層次感，呢位參賽者就展示到嘞！開頭用咗啲好靚嘅氣聲，入咪又唔會 over 。咁樣聽把聲好 Sexy，要痛有痛，要慘有慘，要柔有柔，要剛有剛。我係一個男人聽到呢首歌，我都 feel 到你嗰種男人嘅痛。」海兒則大讚 Nelson 歌聲夠真誠：「你把聲除咗 sexy，仲好真誠好有深度。你嘅 Jaw Muscle 好鬆，導致你瞬間爆發力做得好好，喺唔用力太多嘅情況下可以爆到去嗰個位，非常 nice，期待你之後嘅其他歌曲。」同樣被感動的婉婉，亦忍不住搞笑問：「老老實實，你畀人飛咗幾多次？」
重燃追逐音樂夢希望
原來 Nelson 2015 年曾簽過公司準備出道做歌手，可惜最後等了一年半苦無聲氣，並受盡冷言。「我嗰時 27 歲，有人同我講：『你呢個年紀唔係幾討好架喇』、『記住你個樣，唔係一個靚仔嚟嘅！高度啊、年齡啊、就算唱得幾好都唔駛諗』…我覺得有少少氣餒嘅。」Nelson 直指直到有《中年好聲音》的出現，令到他重燃追逐音樂的夢。「突然間香港有一個咁嘅比賽，令我好驚喜，香港好似變咗咁喎！係咪即係我有機會呢？」並笑言自己一達到參賽年齡最低門檻，便馬上報名參加。
謝昉益獲讚聲底似林峯
第二集有前準歌手之餘、還有「靚聲女高音」及「學霸級林峯」。「靚聲女高音」許雪榕獻唱 〈囚鳥〉，一開聲清脆的靚聲高音超級悅耳動聽、加上滿滿的感情，獲得評審們一致肯定是唱得之人。肥媽：「一開聲，一定係 Classical 底，有氣量、有音域、有音色。」張佳添則讚：「聲底靚，我覺得係唔錯，有 Potential，呢隻歌你唱得 ok，有起伏，牽動到我哋。」
謝昉益獻唱高難度歌曲 〈睡公主〉 獲讚基本功夠好，海兒說：「你基本功全部都唔錯嘅，拍子、音準、氣都幾好嘅」周國豐則說：「我覺得你聲底有啲似林峯，會唔會係日後你一個揀歌嘅選擇呢？！」值得留意的是，現職澳洲註冊心理諮詢師的謝昉益是學霸一名，共擁 3 個 Master，分別是 Sustainability 、幼兒教育及心理諮詢，相當厲害。
《中年好聲音 4 決戰美加澳》出現的參賽者還有：
參賽歌曲：〈霧之戀〉
參賽歌曲：〈想說〉
參賽歌曲：〈戀戀風塵〉
參賽歌曲：〈女人心〉
參賽歌曲：〈月亮代表我的心〉
參賽歌曲：〈一生不變〉
參賽歌曲：〈想你的夜〉