（2023年1月16日）一連六集的《做節必食18 道菜》，今晚十點半翡翠台播出最後一集。今晚一集的主題是粵菜，星廚黃亞保（保哥）將帶領譚俊彥（Shaun）、戴祖儀、蔣家旻及江嘉敏品嚐廣東的新春菜式，包括玩味濃的舊菜翻新「花樣年華」、集合滿漢全席108道菜烹調精髓的「茅台火焰東山羊」及以八種矜貴食材炮製而成的「八仙過海」。
是集有女神戴祖儀、蔣家旻及江嘉敏加持，氣氛熱鬧，三人品嚐材料豐富的「八仙過海」時更爭食鮑魚、金蠔及花膠等名貴食材，嘈到拆天！是集戴祖儀與蔣家旻瘋狂互窒大放笑彈，當二人入廚幫手撻蝦膠時，雖然手勢同樣麻麻，但卻仍有「閒情」鬥嘴，先是祖儀發動攻勢：「睇嚟我哋都係同一類人喎。」家旻聞言反擊：「我覺得我撻得好過你少少。」祖儀唔執輸再補多句：「五十步笑百步！」之後試食「脆皮鹽香雞」時，家旻抵不住誘惑自爆：「平時食雞我唔食雞皮，呢次我要連埋雞皮同瑤柱一齊食。」祖儀聞言再「發攻」：「平時唔食雞皮？你實在太過份！我究竟聽咗啲咩？」家旻則扮惡睥住祖兒，場面搞笑。
至於之前在綜藝節目《男神廚房》中已大展神級廚藝的視帝Shaun，今次再大晒功架示範處理龍蝦，他分享心得謂：「其實有啲軟骨位（指龍蝦尾），只要一吓啪斷佢之後再一抽，就可以成條（龍蝦肉）攞晒出嚟。」由於Shaun有姿勢兼有實際，師傅見狀都忍不住大讚他專業，Shaun事後笑言：「煮嘢食最緊要慢慢嚟，唔可以太心急，一心急就唔好食！」曾在外地留學的Shaun，笑指以前每逢新年都會與一班同學於中餐館食飯慶祝：「一食麵就會諗到嗰句，『除咗食麵之外，係想見多大家幾面』，新年大家聚埋一齊時會特別掛住屋企人。」
